Il-Messaġġ Tal-Papa

Ix-xahar t’Ottubru, biċ-ċelebrazzjoni tal-Ġurnata Missjunarja Dinjija, joffri lill-Komunitajiet djoċesani u parrokkjali, lill-istituti ta’ ħajja Kkonsagrata, lill-Movimenti Ekkleżjali, lill-poplu kollu t’Alla, l-okkażjoni biex iġeddu l-impenn li jxandru l-Evanġelju u lill-attivitajiet pastorali xejra aktar missjunarja. Dan l-appuntament ta’ kull sena jistedinna biex ngħixu bis-sħiħ l-attivitajiet liturġici u kateketiċi, karitattivi u kulturali. Permezz tagħhom Ġesù Kristu jsejħilna għall-mejda tal-Kelma tiegħu u tal-Ewkaristija, biex niggustaw id-don tal-preżenza tiegħu, niġu fformati fl-iskola tiegħu u ngħixu dejjem aktar magħqudin konxjament miegħu, l-Imgħallem u l-Mulej tagħna. Hu stess jgħidilna: ‘’Min iħobb lili, iħobbu wkoll il-Missier, u jiena wkoll inħobbu u nurih lili nnifsi’’ ({w. 14,21).

Huwa biss jekk nibdew b’din il-laqgħa mal-Imħabba t’Alla, li tibdel ħajjitna, li nistgħu ngħixu f’komunjoni miegħu u bejnietna, noffru lil ħutna xhieda kredibbli, u nagħtu r-raġuni tat-tama li għandna (ara1 Pt. 3,15). Fidi matura, li biha nkunu kapaċi nafdaw għalkollox f’Alla bi spirtu ta’ wlied sostnuti bit-talb, bil-meditazzjoni tal-Kelma t’Alla u mill-istudju tal-veritajiet tal-fidi, hija kundizzjoni biex inkunu nistgħu nippromovu umaniżmu ġdid, mibni fuq l-Evanġelju ta’ Ġesù.

‘’Nixtiequ naraw lil Ġesù ’’ ("w 12, 21) hija t-talba li fl-Evanġelju ta’ Ġwanni, xi Ġriegi li kienu waslu Ġerusalemm għall-pellegrinaġġ tal-Għid, għamlu lill-appostlu Filippu. Hija tidwi wkoll f’qalbna f’dan ix-xahar ta’ Ottubru li jfakkarna li l-impenn u d-dmir tax-xandir tal-Evanġelju jinteressa lill-Knisja kollha, li hija ‘’min-natura tagħha missjunarja’’ (Ad Gentes, 2), u jistedinna biex inkunu promuturi tal- ħajja ġdida, magħmula minn relazzjonijiet awtentiċi, f’komunitajiet mibnija fuq l-Evanġelju.

F’soċjeta b’ħafna gruppi etniċi, li dejjem aktar qiegħda ġġarrab forom ta’ solitudni u ta’ indifferenza preokkupanti, l-Insara għandhom jitgħallmu joffru sinjali ta’ tama u jsiru aħwa universali, billi jistimulaw l-ideali kbar li jbiddlu l-istorja. Mingħajr illu\jonijiet foloz jew beżgħat inutli, għandhom jimpenjaw ruħhom biex jagħmlu d-dinja dar għall-popli kollha.

Bħall-pellegrini Griegi ta’ elfejn sena ilu, anki l- bnedmin ta’ żmienna, anki jekk mhux dejjem konxjament, qegħdin jitolbu lil dawk li jemmnu mhux biss li jkellmuhom fuq Ġesu', imma li juruhom lil Ġesù u jagħmlu l-Wiċċ tal-Feddej jiddi f’kull rokna tad-dinja quddiem il-ġenerazzjonijiet tal-millennju l-ġdid, spe`jalment quddiem iż-żgħażagħ ta’ kull kontinent.

Huma għandhom jindunaw li l-insara jwasslu l-kelma ta’ Kristu għaliex Huwa hu l-Verita' u għaliex sabu fih is-sens u l-verita' għall-]ajja tagħhom.

Dawn il-konsiderazzjonijiet jirreferu għall-mandat missjunarju li rċevew l-imgħammdin kollha u l-Knisja kollha, imma li ma jistax jitwettaq b’mod kredibbli mingħajr konverżjoni personali, komunitarja u pastorali profonda. Infatti, l-għarfien tas-sejħa biex ixandru l-Evanġelju jqanqal mhux biss lil kull Nisrani individwali, imma lill-Komunitajiet djoċesani u parrokkjali kollha għal tiġdid sħiħ u għal ftuħ dejjem akbar għall-kooperazzjoni missjunarja bejn il-Knejjes, biex jippromovu x-xandir tal-Evanġelju fil-qalb ta’ kull bniedem, ta’ kull poplu, kultura, razza, u nazzjonalita' kullimkien.

Il-komunjoni ekkleżjali titnissel mil-laqgħa mal-Iben ta’ Alla, Ġesu' Kristu li permezz tax-xandir tal-Knisja, jilħaq lill-bnedmin u joħloq komunjoni miegħu stess u għalhekk mal-Missier u l-Ispirtu s-Santu. Kristu jwaqqaf ir-relazzjoni ġdida bejn Alla u l-bniedem. ‘’Huwa jgħarrafna li ‘Alla hu mħabba’ (1 Ġw. 4, 8) u fl-istess ħin jgħallimna li l-li[i fundamentali tal-perfezzjoni tal-bniedem, u għalhekk tat-tibdil fid-dinja, huwa l-kmandament ġdid tal-imħabba. Lil dawk li jemmnu fl-imħabba ta’ Alla jassigurahom li t-triq tal-imħabba hija miftuħa għall-bnedmin u li l-isforzi biex il-bnedmin kollha jingħaqdu bħal aħwa mhumiex fiergħa’’ (Gaudium et spes, 38).

Il-Knisja ssir komunjoni permezz tal-Ewkaristija, li fiha Kristu, preżenti fil-ħob\ u l-inbid, bis-sagrifiċċju ta’ mħabba tiegħu jibni l-Knisja bħala l-ġisem tiegħu u jgħaqqadna ma’ Alla u bejnietna. Fl-Eżortazzjoni Apostolika Sacramentum caritatis jiena ktibt: "Ma nistgħux inżommu għalina l-imħabba li niċċelebraw fis-Sagrament, Hija titlob min-natura tagħha li titqassam ma’ kulħadd. Dak li d-dinja għandha bżonn hija l-imħabba ta’ Alla; għandha b\onn li tiltaqa’ ma’ Kristu u temmen fih’’ (n. 84). Għal din ir-raġuni l-Ewkaristija mhijiex biss l-għajn u l-quċċata tal-ħajja tal-Knisja, imma wkoll tal-missjoni tagħha. Knisja awtentikament Ewkaristika hija Knisja missjunarja, kapaċi li twassal lil kulħadd għall-komunjoni ma’ Alla u xxandar b’konvinzjoni: "dak li aħna rajna u smajna, aħna qegħdin inxandrulhom biex intom tissieħbu magħna’’ (Ġw. 1, 3).

Għeżież, f’din il-Ġurnata Missjunarja Dinjija li fiha l-ħarsa ta’ qalbna tinfirex fuq l-ispazji immensi tal-missjoni, għandna nħossu lkoll li a]na protagonisti tal-impenn tal-Knisja biex ixxandar l-Evanġelju. L-ispinta missjunarja kienet dejjem sinjal ta’ vitalia' għall-Knejjes tagħna, u l-kooperazzjoni tagħhom hija xhieda spe`jali ta’ għaqda, fraternita' u solidarjeta', li tagħmel kredibbli lill-ħabbara tal-Imħabba li ssalva l-bniedem.

Għalhekk inġedded lil kulħadd l-appell għat-talb u minkejja d-diffikultajiet finanzjarji, għall-impenn biex tingħata għajnuna fraterna u konkreta lill-Knejjes żgħażagħ. Dan il-ġest ta’ mħabba u ta’ qsim bejn l-aħwa jgħin il-formazzjoni tas-saċerdoti, is-seminaristi u l-katekisti fl-artijiet l-aktar imbiegħda tal-missjoni u jinkuraġġixxi lill-komunitajiet ekkleżjali żgħażagħ. Is-servizz prezzjuż tal-Opri Missjunarji Pontifiċji, li lilhom nesprimi l-gratitudni tiegħi, jieħu ħsieb it-tqassim ta’ din l-għajnuna.

Fit-tmiem ta’ dan il-messaġġ annwali għall-{urnata Missjunarja Dinjija, nixtieq nesprimi, b’imħabba speċjali, ir-rikonoxxenza tiegħi lill-missjunarji rġiel u nisa, li jagħtu xhieda tal-wasla tas-Saltna ta’ Alla fil-postijiet l-aktar imbiegħda u diffiċli, spiss anki b’ħajjithom. Lilhom, li qegħdin fuq il-front tax-xandir tal-Evanġelju, kull Nisrani għandu joffrilhom il-ħbiberija, l-interess u l-għajnuna tiegħu. "Alla jħobb lil min jagħti bil-ferħ" (2 Kor. 9, 2) u jimlieh b’ħeġġa spiritwali u ferħ profond.

Kull tweġiba ġeneruża tal-komunità ekkleżjali għas-sejħa divina biex inħobbu lill-aħwa tagħti fiduċja u kuraġġ lill-appostli ġodda. Din it-tweġiba tagħmel lill-Insara kollha kapaċi li jifirħu bit-twettiq tal-pjan ta’ Alla, li jrid "li l-ġens kollu tal-bnedmin isir poplu wieħed ta’ Alla, jingħaqad fil-ġisem wieħed ta’ Kristu u jinbena f’tempju wieħed tal-Ispirtu s-Santu’’ (Ad Gentes, 7).