English version - Click Here
Il-Kappillan, bl-għajnuna ta’ min hu inkarigat, jiġbor l-enveloppi li jitqassmu fid-djar. F’ħafna parroċċi tinġabar somma sabiħa. Kull parroċċa toffri l-ġbir mill-quddies kif ukoll dak ta’ l-enveloppi.
Malli tgħaddi l-Ġurnata Missjunarja, il-flus jintbagħtu fl-Uffiċċju Missjunarju, 7, Triq il-Merkanti, Valletta u jitqegħdu f’fond speċjali. Fil-bidu tas–sena, meta jkun daħal il-ġbir kollu, id-Direttur javża l-Uffiċċju ta’ Ruma dwar is-somma totali.
Fix-xahar ta’ Mejju jiltaqgħu f’Ruma d-diretturi ta’ l-Opri Missjunarji Pontifiċji tal-pajjiżi kollha biex jiddeċiedu kif jitqassam il-ġbir li jkun sar mid-djoċesijiet kollha. L-għajnuna tingħata
(1) f’sussidji ordinarji jiġifieri kull isqof fl-artijiet tal-missjoni jirċievi somma (madwar 10.000 Dollari) biex iwettaq ix-xogħol tiegħu;
(2) f’sussidji straordinarji biex isiru proġetti ta’ bini ta’ knejjes, kliniċi, skejjel, seminarji jew proġetti pastorali (p.eż. formazzjoni tal-katekisti) jew biex jingħata l-ikel u mediċini u għajnuna oħra.
Għax-xahar ta’ Lulju, l-Uffiċċju Missjunarju f’kull pajjiż jirċievi lista ta’ postijiet fejn għandhom jintbagħtu l-flus miġbura. Id-Direttur jibgħat il-fondi direttament fil-pajjiż.
Għalhekk l-offerta tiegħek tista’ tgħin xi katekisti biex jiġbru t-tfal u jgħallmuhom, jew xi sorijiet biex imexxu skola jew klinika; kultant jingħataw il-flus biex saċerdot jixtri mutur jew karozza biex jivvjaġġa. Dak li tfajt fl-invelop jista’ jispiċċa f’pajjiż ‘il bogħod bħas Sri-Lanka jew il-Pakistan jew f’xi post fl-Afrika.
Forsi l-isbaħ ħaġa f’dan l-eżerċizzju ta’ ‘naqsam ma ħaddieħor’ hu l-aspett universali tiegħu: l-insara fil-pajjiżi kollha tal-missjoni jirċievu sehemhom.
Dan kien l-aħħar kmand ta’ Ġesu “Morru agħmlu dixxipli mill-ġnus kollha".